Қазақстан Республикасы Мәдениет және ақпарат министрлігінің қолдауымен Креативті индустрияларды дамыту қоры «Кітап оқитын ұлт» республикалық марафоны аясында «Автормен кездесу» әдеби жобасын іске қосты. Алғашқы кездесу Qazaq Creative Hub орталығында белгілі жазушы, драматург, Абай атындағы Мемлекеттік сыйлықтың лауреаты Роза Мұқановамен өтті.

Бастама Мемлекет басшысының 2026 жылғы 16 мамырдағы «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығын іске асыруға бағытталған. Жоба жастардың көркем әдебиетке қызығушылығын арттыруды, отандық қаламгерлердің шығармашылығын кеңінен танытуды және оқырман мен автор арасындағы тікелей байланысты нығайтуды көздейді.
«Автормен кездесу» жобасының ерекшелігі – оқырмандарға шығарманы талқылаумен шектелмей, оның жазылу тарихын қаламгердің өзінен тыңдауға мүмкіндік беру. Мұндай жүздесулер әдеби туындылардың көркемдік ерекшеліктерін тереңірек түсінуге, кейіпкерлер әрекетіне әр қырынан қарауға және шығармаларда көтерілген мәселелер туралы еркін пікір алмасуға жағдай жасайды.

Алғашқы кездесудің қонағы Роза Мұқанова – қазақ әдебиетінде өзіндік қолтаңбасы қалыптасқан қаламгер. Оның шығармаларында адам тағдыры, ұлттық болмыс, тарихи жады және қоғам алдындағы жауапкершілік мәселелері кеңінен көрініс тапқан.

Шығармашылық жүздесу барысында жазушы әдебиетке келу жолы, шығармаларының жазылу тарихы, кейіпкерлер бейнесін қалыптастыру ерекшеліктері және қазіргі қазақ әдебиетінің дамуы туралы әңгімеледі. Қатысушылар қаламгерге сұрақтар қойып, көркем туындылардағы оқиғалар мен кейіпкерлердің шешімдеріне қатысты өз пікірлерін білдірді.

Кездесудің негізгі тақырыптарының бірі – жазушының кеңінен танылған «Мәңгілік бала бейне» шығармасы болды. Семей ядролық полигонындағы сынақтардың адам өміріне тигізген ауыр зардаптарын суреттейтін туындыда жеке адамның трагедиясы арқылы тұтас қоғамның қасіреті бейнеленеді.

Шығарманы талқылау барысында тарихи оқиғалардың адам тағдырына әсері, ұрпақ алдындағы жауапкершілік, адамгершілік құндылықтар және өткеннің тағылымын сақтау мәселелеріне назар аударылды. Қатысушылар туындының бүгінгі қоғам үшін маңызы жөнінде ой бөлісті.

Жобаның негізгі міндеттерінің бірі – жастардың әдеби шығармаларды терең түсінуіне, ондағы оқиғалар мен кейіпкерлерге қатысты өз пікірін қалыптастыруына мүмкіндік беру. Қаламгерлермен кездесулер барысында оқырмандар туындылардың жазылу тарихымен танысып, көкейіндегі сұрақтарына автордың өзінен жауап ала алады.

Сонымен қатар жоба қазіргі қазақ әдебиетін оқырманға жақындатуға бағытталған. Авторлармен еркін әңгімелесу арқылы жастар олардың шығармашылық ізденістерімен танысып, әдеби туындылардың өмірлік оқиғалармен, тарихи кезеңдермен және қоғамдық құндылықтармен байланысын тереңірек түсіне алады.

Креативті индустрияларды дамыту қоры «Автормен кездесу» жобасын тұрақты түрде жалғастыруды жоспарлап отыр. Алдағы уақытта отандық жазушылар, ақындар және әдебиет өкілдерімен жүздесулер ұйымдастырып, олардың шығармаларын жастар арасында кеңінен таныту көзделген.

Жоба «Кітап оқитын ұлт» республикалық марафонының мақсаттарына сәйкес әдебиетке қызығушылықты арттыруға, оқырман қауымын кеңейтуге және кітап оқу мәдениетін дамытуға үлес қосады.