Вокалистер үш кезеңді тыңдаудан өтті, онда олардың кәсіби дағдыларын опера сахнасының танымал шеберлері бағалады. Қазылар алқасының мүшелерінің арасында - танымал педагог, профессор Дмитрий Вдовин, сұранысқа ие опера педагогы, пианист және дирижер Алессандро Бениньи, профессор, Қазақстанның еңбек сіңірген қайраткері Азамат Желтырғузов, итальяндық дирижер Джузеппе Акуавива және Италиядан келген профессор Алла Симонишвили. Олардың әрқайсысы қарқынды оқу процесіне енуге дайын үздік орындаушыларды таңдау процесіне өзіндік үлестерін қосты.

Тыңдау нәтижесінде Astana Opera Халықаралық опера академиясына 10 академист қабылданды. Жаңа топтың құрамында - талантты орындаушылар - Асылзат Нұғыманова, Дильназ Омарханова, Рузиля Тюменцева (Ресей), Сара Садығұлова, Айгерім Темірбекова (сопрано), Василиса Савкина (Ресей, меццо-сопрано), Абылай Бекен, Белал Қуаныш (тенор), Мунхтувшин Хоролгарав (баритон, Моңғолия), Диас Орысбай (бас).

«Мен үшін академияға түсу – әртіс ретінде өсуге керемет мүмкіндік. Көрнекті шеберлердің жетекшілігімен білім алу – баға жетпес тәжірибе. Әрбір сабақ, әрбір жаттығу вокалдық техника мен сахналық шеберлікте жаңа көкжиектерді ашады. Мұнда біз жай ғана ән айтуды үйренбейміз – біз музыканы түсінуді, оны сахнада бастан кешіруді және көрермендермен дыбыстар мен ноталарға қарағанда әлдеқайда көп нәрсемен бөлісуді үйренеміз», - деп атап өтті баритон Мунхтувшин Хоролгарав.

Солистерді вокал бойынша тереңдетілген сабақтар ғана емес, сонымен қатар шетелдік оқытушыларды қоса алғанда, опера өнерінің танымал шеберлерінің мастер-класстары күтеді. Академистер сахнада жұмыс істеудің баға жетпес тәжірибесін алады: олар «Астана Опера» театрының екі алаңында – Камералық және Үлкен залдардың сахналарында өнер көрсетеді, бұл кәсіби опера театрының атмосферасына толық енуге және қойылымдардағы ең әртүрлі партияларда өздерін сынауға мүмкіндік береді.