Алматылық Lumiere-Hall мультимедиялық мұражайының қызметкерлері Астанаға 80-нен астам өнер туындысын әкелді. Еуропа мен АҚШ-тың жеке коллекциялары мен галереяларынан жиналған жұмыстар 20 суретшінің шығармашылығын қамтиды және поп-арт феноменін көрсетеді. Экспозиция осы көркемдік бағыттың дамуы мен эволюциясын ашатын үш негізгі блокқа бөлінген.

«Әрине, көпшілік Энди Уорхолдың арқасында поп-артпен таныс. Бұл үшін ешкімді кінәлай алмаймыз. Сол жылы Энди Уорхол тіпті Ван Гогтан да асып түсіп, ең көп сатылатын суретші атанды. Оның жұмыстары аукциондардағы құны бойынша ең танымал болды. Энди Уорхолды бәрі біледі, бірақ біз басқа да есімдердің кеңінен танылуын қалаймыз. Көрмеге келушілер көптеген образдарды көргенін, бірақ авторларын білмегенін айтады. Біз поп-арт классиктерін жинап, қазіргі заманғы шеберлермен біріктірдік», - деп атап өтті Lumiere-Hall мұражайының негізін қалаушы Полина Егармин.

Экспозицияның бірінші бөлімі көрермендерге поп-арттың «алтын ғасырының» жұмыстарын ұсынады — осы бағыттың негізін қалаған суретшілер. Мұнда Энди Уорхол, Рой Лихтенштейн, Кит Харинг, Роберт Раушенберг және Джаспер Джонс сияқты иконалардың туындыларын көруге болады. Бұл шеберлер бұқаралық мәдениеттің образдарын — комикстерден бастап жарнама мен атақты тұлғаларға дейін пайдаланып, оларды көркемдік көріністің белгілеріне айналдырды.

«Біз бұл көрмені әкеле алғанымызға өте қуаныштымыз. Шамамен бір жыл кезекте тұрдық. Және Қазақстанға екі қалада көрсету үшін төрт айға әкелдік. Бұл біздің «Has Sanat» галереясымен Дали көрмесінен кейінгі екінші коллаборациямыз. Астанада Lumiere-Hall мұражайы жоқ. Поп-арт терминінің өзі бізге оның не екенін айтады. Поп-арт - танымал өнер. Барлық суретшілер өнерді элиталықтан өте қолжетімді нәрсеге айналдырғысы келді», - деді Полина Егармин.

Көрменің екінші бөлігінде поп-арт идеяларын қайта қарастыратын заманауи суретшілердің жұмыстары жиналған. Префаб 77, Бэнкси және Ричард Райан сияқты суретшілердің туындылары кіреді. Олардың шығармашылығы поп-арттың көше өнерімен, цифрлық технологиялармен және өзін-өзі көрсетудің жаңа формаларымен үндесе отырып, шабыт көзі болып қала беретінін көрсетеді.

«Мүмкін, қазіргі заманғы авторлардың ең көрнекті өкілі - Бэнкси. Оның плакаттары мен трафареттік басып шығаруы қызықты. Оны бәрі граффити бойынша біледі. Біз Астанада поп-арт өкілдері туралы дәрістер циклын бастаймыз. Олардың өмірінен қызықты фактілер айтамыз. Мысалы, Энди Уорхолдың анасына қатты байланғаны және «анасының баласы» болғанына қатты мақтанғаны туралы», - деп қосты Полина Егармин.

Көрменің үшінші блогы қазақстандық суретші Мими Ильницкаяның поп-артқа бірегей интерпретациясын ұсынады. Өз жұмыстарында ол ұлттық символдарға жүгінеді, оларды поп-арт эстетикасымен үйлесімді түрде біріктіреді.

«Мими - біздің досымыз, мұражайдың жиі қонағы. Оның жұмыстары Алматы көрмесінде болған жоқ. Бұл экспозицияға қосылған ерекшелік. Мими Алматыдағы осы көрменің ашылуында болды және біз одан шабыт алып, поп-артқа өзінің интерпретациясын ұсынуын сұрадық. Келушілер Мимидің суретіне қарап, Энди Уорхолдың алғашқы көрмелерінде болған адамдар сияқты сезімдерді бастан өткерсе екен дедік. Қазірдің өзінде маған келіп, сүт бренді сізбен байланыса ма деп сұрайды. Кэмпбелл сорпасының банкалары туралы Энди Уорхолға да осындай сұрақтар қойылды», - деді Полина Егармин.

Көрме көрермендерге поп-арттың дамуының негізгі кезеңдерімен — оның бастауларынан бастап қазіргі заманғы интерпретацияларға дейін танысуға мүмкіндік береді. Экспозиция бұл бағыттың байлығын көрсетіп қана қоймай, бұқаралық мәдениеттің біздің күнделікті өмірімізге әсері туралы ойлануға шақырады.