Келушілерге Еуропаға гастрономиялық саяхат жасауға және деликатестердің кең ассортиментін: үй ірімшіктерінен, сүт өнімдері мен еттен бастап, талғампаз кілегей майына, шараптар мен күшті сусындарға дейін татып көруге мүмкіндік беріледі. Көрмеде ұсынылған барлық өнімдерді ұйымдастырушылар мұқият таңдап алған. Олар жоғары сапа стандарттарына жауап береді және ең қатал гурмандардың талғамын қанағаттандыра алады.

«Еуропалық Одаққа мүше көптеген елдер ғасырлар бойы белгілі бір өнімдерді дәстүрлі түрде өсіруімен танымал. Мысалы, ірімшік пен шарапты тұтынудың ерекше мәдениеті бар. Астанада біз келушілерді Еуропалық Одаққа мүше 27 елдің барлығының гастрономиялық дәстүрлерімен таныстыратын 250-ден астам өнім түрін ұсындық. Кез келген адам осында келіп, олардың дәмін көре алады. Бізде әртүрлі дегустация алаңы бар. Мысалы, ет тағамдарына шарапты қалай дұрыс таңдау керектігін айтамыз. Әрине, біз ынтымақтастыққа ашықпыз және біздің павильон Қазақстан бизнесі өкілдерінің назарын аударады деп үміттенеміз. Біздің делегация құрамында Еуропалық Одақтан Қазақстан нарығында өз өнімдерін ұсынуға дайын 40-қа жуық кәсіпкер бар», - деді Еуропалық комиссияның өкілі, Еуропалық Одақ павильонының ұйымдастырушысы Камелия Параскив.

Еуропалық комиссияның өкілі Камелия Параскив

ЕО павильоны өнімдердің алуан түрін ұсынып қана қоймай, келушілерді еуропалық гастрономия тарихымен таныстырады. Қонақтарды танымал қазақстандық аспазшы Азамат Рахметуллаевтың шеберлік сыныптары кулинария өнері әлеміне тартады.

«Біз Жерорта теңізі салатын дайындау бойынша шеберлік сыныбын өткізіп үлгердік. Бүгін біз тирамису мен саңырауқұлақ қосылған равиоли де дайындаймыз. Бізде бүкіл процестің басынан аяғына дейін толық көрсетілімі бар. Сонымен қатар, әріптестерім көпшілік үшін шағын дегустациялық порциялар дайындайды. Біздің шеберлік сыныптарымыз еуропалық өнімдерді ұсынуға бағытталған. Біз олармен қалай жұмыс істеуге болатынын, оларды немен үйлестіруге болатынын және олардан қандай нәтижеге қол жеткізуге болатынын көрсетеміз. Бұл ретте, біз еуропалық өнімдермен ғана шектелмейміз. Біз оларды жергілікті өнімдерімізбен үйлестіруге тырысамыз. Еуропалық асхана бүгінде біз көріп жүрген нәрсенің бәрінің бастауы болып саналады деуге болады. Француз асханасы қазір көптеген мейрамханаларда ұсынылған барлық нәрсе үшін іргелі болып табылады. Менің өзім Испанияда тәжірибеден өттім. Ол менің кәсіби қалыптасуыма үлкен әсер етті», - деп атап өтті аспазшы Азамат Рахметуллаев.

Аспазшы Азамат Рахметуллаевтың шеберлік сыныбы

Келушілер еуропалық тамақтану мәдениетімен және ауыл шаруашылығын жүргізу әдістерімен жан-жақты танысуға мүмкіндік беретін ақпараттық сессияларға, дәм татуларға және шеберлік сыныптарына қатыса алады. Қызықты семинарлардың тақырыптары әртүрлі: «Трансконтинентальды дәмді жаңалықтар: Еуропа ірімшіктері бойынша саяхат», «Керемет үйлесім: еуропалық шарап пен ет», «Еуропалық эликсир үшін экспедиция: еуропалық талғампаздықпен коктейльдер дайындау» және т.б.

Interfood көрмесі 29-31 мамыр аралығында Астана халықаралық көрме орталығында Маңгілік Ел даңғылы, 53/1 мекенжайы бойынша өтеді.