Іс-шара аясында оның француз тіліне аударылған «Менің атым Қожа» атты танымал кітабының тұсаукесері өтті.

Конференцияға ЮНЕСКО Бас директорының орынбасары Эрнесто Оттоне, Қазақстан Республикасы Мәдениет және ақпарат министрлігінің Архив, құжаттама және кітап ісі жөніндегі комитетінің төрағасы Рустам Әли, Қазақстан Жазушылар одағының төрағасы Мереке Құлкенов және ТҮРКСОЙ халықаралық ұйымындағы Қазақстан өкілі Бақытжан Омар қатысты.

Қатысушылар Соқпақбаевтың аударылған кітабы жас француз оқырмандарына қазақ мәдениетінің бірегей әлемімен танысуға, олар үшін Қазақстан халқының бай дәстүрлері мен құндылықтарын ашуға мүмкіндік беретініне сенім білдірді.

Бердібек Соқпақбаевтың 100 жылдығының ЮНЕСКО-ның естелік күндерінің күнтізбесіне енгізілуі оның әлемдік мәдениетке қосқан үлесінің маңыздылығын көрсетеді. 1952 жылдан Қазақстан Жазушылар одағының мүшесі Соқпақбаев тірі кезінде-ақ қазақ балалар әдебиетінің классигі болып танылды және оның шығармашылығы өскелең ұрпаққа әсер етуін жалғастыруда.

Қазақстан тарапы іс-шараны ұйымдастырудағы қолдауы үшін ЮНЕСКО-ға алғыс білдірді, сондай-ақ қазақ мұрасын халықаралық аренада ілгерілететін мәдени шаралардың маңыздылығын атап өтті.