Алматыдағы Қазақстан Республикасының Ұлттық музейінде «Шығыстан Батысқа дейін» атты қуыршақ көрмесі ашылды. Экспозицияда түрлі техникамен және сан алуан материалдан жасалған 150-ге жуық авторлық жұмыс ұсынылған.

Көрме Алматы, Астана, Рудный, Жаркент және Павлодар қалаларынан келген шеберлерді бір алаңға тоғыстырды. Келушілер назарына авторлық мүсіндеу, көркемдік бедерлеу, қол кесте және шағын сәндік элементтер қолданылып жасалған қуыршақтар ұсынылған. Экспозиция мәдени образдардың, көркемдік дәстүрлер мен шығармашылық тәсілдердің алуан түрлілігін танытады.

Көрмеде тарихтан, мифологиядан және ұлттық мұрадан шабыт алған бейнелер ерекше назар аудартады. Олардың қатарында «Нибула» атты дала жауынгері, Ұлы Жібек жолы тақырыбын арқау еткен «Қытай ханшайымы», сондай-ақ күш-қуаттың, шаңырақ қорғаудың және ақ батаның символы саналатын «Хумай құс-әйел» композициясы бар.

Экспозициядағы ерекше туындылардың бірі – полимерлі саздан жасалған «Алтын адам» бейнесі. Бұл жұмыс жоғары дәлдікпен орындалып, екі мыңнан астам сәндік элементпен толықтырылған.

Көрме керамика, саз, металл, тоқыма және табиғи талшықтар секілді материалдар мен тәсілдердің кең аясын қамтиды. Ұйымдастырушылардың айтуынша, авторлардың әрбір бөлшекке ерекше мән беруі экспозицияның басты ерекшелігі болып табылады. Соның арқасында әр жұмыс өзіндік көркемдік келбетімен және айқын мәнерімен дараланады.

Экспонаттар қатарында қазақ халқының көрнекті тарихи тұлғалары мен мәдениет қайраткерлеріне арналған бейнелер де бар. Олардың арасында билеушілер, ойшылдар мен ағартушылар образы ұсынылған. Көрме танымал шеберлермен қатар, өз жұмыстарын алғаш рет көпшілік назарына ұсынып отырған авторларды да біріктірді.

Музейде мұндай көрме екінші рет ұйымдастырылып отыр. Ол дәстүр, тарих және авторлық шығармашылық көзқарас тоғысқан заманауи қолданбалы өнермен таныстыруды жалғастыруда.