Қазақстан халықаралық киноөндірістің маңызды алаңдарының біріне айналып келеді. Маңғыстау облысында әлемге әйгілі актер Джеки Чан қатысатын «Armour of God: Ultimatum» халықаралық фильмінің түсірілімі ресми түрде басталды. Ауқымды жоба Sәlem Entertainment және Dala Edge Creative Tech Park компанияларының қатысуымен жүзеге асырылуда. Фильмнің басты түсірілім алаңдарының бірі ретінде Маңғыстаудың символына айналған Бозжыра шатқалы таңдалды. Бірегей табиғи ландшафтымен ерекшеленетін бұл мекен халықаралық блокбастердің негізгі көріністеріне арқау болмақ. Бұған дейін фильмнің бірқатар эпизодтары Алматы облысындағы Қаскелеңде, арнайы салынған Dala Stage кинопавильонында түсірілген. Ал Маңғыстаудағы түсірілім жұмыстары жобаның табиғи көріністерін толықтырып, Қазақстанның ерекше табиғатын әлемдік аудиторияға таныстыруға мүмкіндік береді. Жобаның ашылу рәсімінде режиссер Роберт Кун мен актер Джеки Чан дәстүр бойынша кинотарелканы сындырып, түсірілім кезеңіне ресми түрде старт берді.

Бұл жоба тек кино өндірісі үшін ғана емес, еліміздің креативті индустриясы мен мәдени туризмін дамыту тұрғысынан да маңызды бастама саналады. Халықаралық деңгейдегі фильмнің Қазақстанда түсірілуі жергілікті шығармашылық мамандардың тәжірибе алмасуына, заманауи киноөндіріс технологияларын меңгеруіне және жаңа серіктестіктердің қалыптасуына жол ашады. Сонымен қатар Бозжыра сияқты табиғи нысандардың әлемдік кино арқылы көрсетілуі өңірдің туристік әлеуетін арттырып, Қазақстанды халықаралық кинолокациялар картасында жаңа деңгейге көтеруге ықпал етеді. Сарапшылардың пікірінше, мұндай жобалар елдің инвестициялық тартымдылығын күшейтіп қана қоймай, креативті экономиканың дамуына да серпін береді. Фильмнің Қазақстандағы түсірілім кезеңі бірнеше айға жалғасады, ал халықаралық прокатқа шығуы 2027 жылға жоспарланған. Осындай ауқымды жобалардың жүзеге асуы Қазақстанның әлемдік киноиндустриядағы орнын нығайтып, ұлттық шығармашылық экожүйенің әлеуетін кеңінен танытуға мүмкіндік береді.