Бүгінде театрға қызығатын жастар саны артып, әлеуметтік желіде түрлі қойылым үзінділері танымал бола бастағанын байқауға болады. Көрермен талғамына сәйкес, театрлар арасында «мәдениетті бәсеке» орнап, саланың жаңа тынысын ашқандай.

Астана қалалық «Жастар» театрында әдебиет пен театрды тоғыстыратын жаңа жоба бастау алды. Мақсаты – театр мен әдебиет арасындағы шығармашылық байланысты күшейту, сахнаға бейімделген дарамалық шығармаларға жол ашу, қазіргі қазақ әдебиетіндегі жас қаламгерлердің жаңа көзқарасын, жанрлық, пішіндік ізденістерін қолдау. Поэзия, проза, драматургиядағы жас авторларды біріктіре отырып, театр мен әдебиет тоғысында жаңа кеңістік қалыптастыру.

- Театр – жай ғана спектакль емес, күрделі ойдың толғағы, әр көрерменнің өзі мен өзі бетпе-бет болатын орны. Бұрын біз жақсы қойылым көріп, көңіліміз көтерілсе болды десек, бүгінгі күні ол аздық етеді. Адамзаттың ой-өрісі, жан-дүниесі өзгеріп жатыр. Қазір көрермен сахнадан өз заманының кейіпкерін көргісі келеді, толғанысын сезінгісі келеді. Соған сай жаңаша ойлану қажет. Осыған дейін түрлі даму кезеңдерінен өткен қазақ мәдениеті, оның ішінде театр әлемі бүгінде сүзгіден өту кезеңінде тұр. Осы тұста әдебиет пен театрдың арасы ажырап кеткені байқалады. Театр мамандары, режиссерлер, жас қаламгерлермен кеңесе келе, театрымызда жаңа жобаны қолға алдық. Жоба аясында құрылған кеңістік алдағы уақытта үнемі бас қосып, қойылымдарға талдау жасайтын тұрақты ортаға айналмақ, – дейді ақын, «Жастар» театры директорының орынбасары Мақпал Мыса.

Сондай-ақ, жоба аясында «Жаңа толқын – жаңа драма» атты ашық байқау жарияланды. Байқау шарты бойынша қатысушы үміткерлер шағын пьеса, сахнаға лайық поэтикалық цикл, монодрама, қысқа проза, сахналық новелла ұсына алады.

- Қазір режиссерлер жаңа авторларды іздейді, жаңа шығармаларды сахналағысы келеді, бірақ таппай жатады. Біз сол көпірді жалғап, жас буынға жаңа мүмкіндіктерге жол ашқымыз келеді. Байқауға қатысу үшін шығармалар 25 қазанға дейін тапсырылуы керек. Жыл соңында қорытындысын жасаймыз. Жеңімпаздарға арнайы сыйлықтар қарастырылған. Театрдың көркемдік кеңесінің сүзгісінен іріктеліп шыққан үздік шығармалар сахнаға жол тартады. Ал, жас драматургтер актерлермен бірге шығармашылық резиденцияға, яғни дайындық процесстеріне, сахналық зертханаға қатысады.

Жоба соңында жиналған туындылар «Сахнаға жаңа сөз» атты жинаққа топтастырылып, басылып шығады.

- Нәтижесін біздің театр ғана емес, еліміздің барлық театры көреді деп ойлаймыз. Себебі, бұл жинақ көптеген театрларға, режиссерлерге азық болмақ.