Наурыз мерекесі – адамдарды бір-біріне жақындастырып, татулық пен достықты нығайта түседі. Ал, Ынтымақ күні ел ішіндегі бірлік пен келісімнің маңызын айшықтайтын мереке.

Айтулы күнге орай ұлты неміс болса да, қазақ тілінде білім алып, бүгінде мемлекеттік тілдің жанашыры ретінде танылып жүрген Светлана Крюгермен әңгімелестік. Ол халықтар арасындағы ынтымақ пен сыйластықтың маңызы туралы ой бөлісті.

– Сіз үшін Ынтымақ күнінің мәні неде?

– Бұл мен үшін адамдар арасындағы достық пен татулықты дәріптейтін ерекше мереке. Бірлік пен өзара құрметтің қаншалықты маңызды екенін тағы бір мәрте еске салатын күн. Адамдар бір-біріне түсіністікпен қарап, қолдау көрсете білсе, қоғамда бейбітшілік пен келісім орнығады. Меніңше, ынтымақ – тек бірге өмір сүру ғана емес, бір-бірін сыйлап, қажет кезде қол ұшын соза білу. Осындай құндылықтар адамдарды жақындастырып, қоғамның тұтастығын нығайтады.

– Қоғамдағы татулық пен бірлікті сақтаудың басты құндылықтары қандай деп ойлайсыз?

– Біріншіден, сыйластық. Әр адамның пікірі мен құқығын сыйлау қоғамда түсіністік пен сыйластықты қалыптастырады. Екіншіден, төзімділік. Адамдарды ұлтына, тіліне, дініне қарамастан тең қабылдау қоғамдағы бейбітшілік пен келісімді сақтауға негіз болады. Үшіншіден, әділдік. Заң үстемдігі мен әділдік сақталған жерде ғана адамдар арасында сенім қалыптасады. Көмек көрсету мен қолдау білдіру де аса маңызды. Қиын жағдайда бір-біріне жәрдемдесу адамдарды жақындастырып, қоғамның бірлігін нығайтады.

Татулықтың тағы бір маңызды шарты – түсіністік пен ашық диалог деп білемін. Келіспеушіліктерді жанжалсыз, өзара сөйлесу арқылы шеше білу қажет. Қоғамда құрмет, төзімділік, әділдік және өзара қолдау сияқты құндылықтар орнықса, адамдар арасында әрдайым бірлік пен татулық сақталады деп есептеймін.

– Сіздіңше, көпұлтты, мәдениеттер мен дәстүрлер тоғысқан еліміздегі бейбітшілік пен тұрақтылықтың басты сыры неде?

– Менің ойымша, Қазақстандағы бейбіт өмірдің басты сыры – бірлік пен сыйластық. Елімізде түрлі этнос өкілдерінің тең өмір сүруіне барлық жағдай жасалған. Осындай сыйластық пен түсіністік татулықты нығайтып, ел ішіндегі бейбіт өмірдің берік негізіне айналып отыр.

– Жастардың бойында ынтымақ пен толеранттылықты қалыптастыру үшін не істеу керек деп ойлайсыз?

– Ең алдымен сапалы тәрбие мен білім беру қажет. Сонымен қатар оларды ортақ іс-шараларға кеңінен тарту арқылы бұл құндылықтарды нығайтуға болады деп ойлаймын. Балаларды жастайынан бір-бірін құрметтеуге, мейірімділікке баулу маңызды. Мектеп қабырғасында мәдениет пен дәстүр туралы білім беру жастардың өзге халықтарды түсінуіне ықпал етеді.

Сондай-ақ, аға буын мен қоғам қайраткерлері өз іс-әрекеті арқылы татулық пен сыйластықтың нақты үлгісін көрсетуі қажет. Ортақ іс-шаралар, спорттық жарыстар мен мәдени фестивальдердің жиі өткізілуі жастарды жақындастырып, өзара түсіністікті арттырады. Мысалы, Қазақстан халқы Ассамблеясы жастар арасында достық пен келісімді нығайтуға бағытталған түрлі жобаларды тұрақты түрде жүзеге асырып келеді.

– Ынтымақ күніне орай қазақстандықтарға айтар тілегіңіз?

– Барша қазақстандықтарды Ынтымақ күнімен шын жүректен құттықтаймын! Елімізде әрдайым татулық, сыйластық пен бірлік салтанат құрсын. Бірлігіміз бекем, достығымыз мәңгі болсын! Әр шаңыраққа амандық, бақыт пен береке тілеймін.