Nomad Ballet бағдарламасы аясында өнер жанашырлары отандық хореографтар Сұлтанбек Гумардың, Алмат Шәмшиевтің, Анвара Садықованың, сондай-ақ шетелдік балетмейстер Патрик де Бананың шығармашылығымен танысуға мүмкіндік алды.

Әмина Кісембаева мен кордебалеттің орындауындағы Steppe Sons альтернатив-фолк тобының музыкасына жазылған Анвара Садықованың «Сармат абысыны» және Ислам Қайыпбайдың орындауындағы Сұлтанбек Гумардың «Рух» нөмірі зал атмосферасын төзімділік пен патриотизм рухына толтырды. «Астана Опера» балет труппасының әртістері хореограф-қоюшылардың идеяларын сахнада шеберлікпен жүзеге асырып, залдың қызу қошеметіне бөленді.

«Бүгінгі кеште ұсынылған хореографиялық нөмірлер мені көп ойландырды. Әсіресе, жас хореограф Сұлтанбек Гумардың Лимара Айдарова мен Руслан Қанағат театр әртістерінің орындауындағы «Маңқұрт» миниатюрасы қатты ұнады. Бұл туынды біздің заманымыз үшін өзекті. Өкінішке орай, қазіргі қоғамда адамдар рухани құндылықтарға емес, материалдық құндылықтарға көбірек көңіл бөледі. Кітап оқу, театрға бару азайып, телефонға бату көбейді. Бұл болашақта қоғамның рухани құлдырауына әкелуі мүмкін. Сондай-ақ Алмат Шәмшиевтің қойылымындағы «Дем» нөмірі маған үлкен әсер қалдырғанын атап өткім келеді, одан мен нағыз ұлттық колоритті көрдім. Театрдың осындай талантты кадрларды өсіріп, олардың жұмыстарын сахнада көрсетуге мүмкіндік беруі өте дұрыс», – деп бөлісті көрермендердің бірі Айым Мұханбетжанова.

Сұлтанбектің өзі Патрик де Бана қойған «Тұран» этно-фольклорлық ансамблінің музыкасына жазылған «Қилы заман» нөмірімен сахнаға шықты. Халықтың тәуелсіздік жолында бастан кешкен қиындықтары туралы баяндайтын нөмір кеш бағдарламасын толықтырды. Сондай-ақ Шугыла Адепхан мен Диас Құрманғазы, сондай-ақ Олжас Тарланов пен Әсел Шайкенованың орындауындағы осы керемет хореографтың «Дала үні» балетінен алынған дуэттер махаббат пен бабалар даналығының күшін ашты.

Алмат Шәмшиевтің «Дем» хореографиялық миниатюрасының премьерасы кештің ерекше оқиғасы болды. Әртістер Бекзат Орынбаев, Райымбек Болат және Досхан Зайдин әр кейіпкердің мінезін үйлесімді түрде жеткізе білді. Бұл қойылым баршаның жадында өзінің эмоционалдық қанықтығымен және терең мазмұнымен есте қалды.

Сонымен қатар, көрермендер М. Фокиннің хореографиясындағы Н. Римский-Корсаковтың музыкасына жазылған «Шехеразада» балетінен де ләззат алды. Балет труппасының жетекші солистері, Қазақстанның еңбек сіңірген қайраткерлері Бақтияр Адамжан мен Әнел Рүстемова Алтын құл мен Зобеиданың басты партияларын керемет орындады.

Туған театрында қошеметке бөленген «Астана Опера» балет труппасы әйгілі «Дубай Опера» сахнасына шығуға дайындалуда. Естеріңізге сала кетейік, ұжым ҚР Мәдениет және ақпарат министрлігінің қолдауымен 19, 20, 21 және 22 желтоқсанда Юрий Григоровичтің қойылымындағы П. Чайковскийдің «Щелкунчик» балетін ұсынады.