Қазақ ұлттық хореография академиясы IQAA – 2026 Қазақстанның жетекші жоғары оқу орындарының ұлттық рейтингінде өнер саласындағы оқу орындары арасында бірінші орын алды.

Рейтингті қалыптастыру кезінде жоғары оқу орнының білім беру және ғылыми көрсеткіштері, сарапшылар бағасы, сондай-ақ жұмыс берушілердің, студенттер мен түлектердің пікірі ескеріледі.

Академияның жоғары нәтижесі білім беру, ғылым және шығармашылық бағыттағы жүйелі жұмысты, заманауи бағдарламалардың енгізілуін және халықаралық ынтымақтастықтың дамуын көрсетеді.

Қазақ ұлттық хореография академиясы – Орталық Азияда хореографиялық білім берудің көпдеңгейлі толық жүйесін жүзеге асыратын алғашқы әрі бірегей жоғары оқу орны. Академия шәкірттері ұлттық және халықаралық жобаларға қатысып, шетелдік хореография орталықтарымен бірлескен кәсіби даярлықтан өтеді.