Бұл маңызды мәдени іс-шара бүкіл әлем бойынша хореография мектептері арасында тәжірибе алмасу және байланыстарды нығайту алаңына айналды.

Фестивальдің салтанатты ашылуы құрметті қонақтармен баспасөз конференциясымен белгіленді. Баспасөз конференциясына Қазақ ұлттық хореография академиясының және «Astana Opera» театры балет труппасының көркемдік жетекшісі Алтынай Асылмұратова, Академия ректоры Бибігүл Нүсіпжанова, Пекин би академиясының балет департаментінің әйгілі балет әртісі және директоры Владимир Малахов, Мариинский театрының прима-балеринасы Диана Вишнёва, «Раушан гүлі мен көбелектің романы» балетінің хореографы Василий Медведев, Борис Эйфманның Би академиясының көркемдік жетекшісі Константин Матвеев, Пекин би академиясының вице-президенті Су Я қатысты.

Баспасөз конференциясы барысында қонақтардың әрқайсысы әртүрлі мәдениеттер мен білім беру мекемелері арасындағы тәжірибе алмасудың маңыздылығын атап өтті. Жаңа спектакльдердің қоюшылары кулуардың қызықты егжей-тегжейлерімен, шығармашылық идеяларымен, қойылымға деген көзқарастарымен және әрбір туындының бірегей ерекшеліктерімен бөлісті.

Көрермендерге Қазақ ұлттық хореография академиясының бірегей қойылымы — хореограф Василий Медведевтің редакциясындағы және Мариус Петипаның соңғы туындысына негізделген «Раушан гүлі мен көбелектің романы» балеті ұсынылды. Рикардо Дригоның музыкасына жазылған спектакль түпнұсқа қойылымның жасалғанына 120 жыл толуына арналды.

Фестиваль аясында әлемдік балет жұлдыздарының — Мариинский театрының прима-балеринасы Диана Вишневаның және әйгілі әртіс және хореограф Владимир Малаховтың шеберлік сыныптары өтті. Шеберлік сыныптары фестивальге қатысушылар мен қонақтарға ең жоғары деңгейдегі өнермен жанасуға, классикалық хореография әлеміне енуге және шеберлердің тәжірибесін алуға мүмкіндік берді. Сондай-ақ «Қазіргі білім беру жүйесіндегі хореографиялық мектепті дамыту перспективалары» тақырыбында дөңгелек үстел өтті, онда отандық және шетелдік мамандар би өнерін дамыту мәселелерін талқылады.

Фестивальдің шарықтау шегі Astana Ballet театрында өткен Гала-кеш болды. Борис Эйфманның Би академиясының және Пекин би академиясының студенттері көрермендерге өз бағдарламаларын ұсынды. Борис Эйфманның Би академиясы сенім, үміт және махаббат тақырыптарына арналған «Epiphania» бір актілі балетімен өнер көрсетті. Пекин би академиясы классикалық шығармалар мен заманауи қойылымдарды біріктірген, хореографиялық өнердің көп қырлылығы мен сұлулығын көрсететін «Дивертисмент» бағдарламасын көрсетті.

«Temps lié» фестивалі қатысушылардың тәжірибе алмасуына, кәсіби байланыстарды орнатуына және жаңа шығармашылық жобаларға шабыт табуына мүмкіндік беретін маңызды халықаралық алаңға айналды.