Қазақстан Республикасының Ұлттық орталық музейінде суретші Ақылбек Тампиевтің «Бабалар ізімен» атты жеке көрмесі ашылды.

Экспозицияға тарихи жады, ұлттық дәстүр және ұрпақтар сабақтастығы тақырыптарын арқау еткен 55-ке жуық туынды енген. Қазақ даласы, адам болмысы, дәстүрлі тұрмыс пен отбасы құндылықтары арқылы суретші ата-баба мұрасын рухани қуат пен ұлттық болмыстың қайнар көзі ретінде танытады.

Ақылбек Тампиев – заманауи қазақстандық кескіндемеші, Қазақстан Суретшілер одағының, Қазақстан дизайнерлерінің ұлттық орталығының, Ұлттық дизайн академиясының және «Тұмар-арт» суретші-педагогтер қауымдастығының мүшесі. Ол халықаралық, республикалық және қалалық көрмелерге белсенді қатысып, шығармашылықпен қатар ұстаздық қызметпен де айналысады.

Суретшінің көркемдік мәнерінде академиялық кескіндеме мектебі мен табиғатты пленэрде тікелей қабылдау тәсілі ұштасады. Оның шығармаларында пейзаж, жанрлық композиция, натюрморт және қазақ этнографиясына қатысты сюжеттер ерекше орын алады.

Көрменің негізгі бейнелерінің бірі – дала салт аттысы. Ол еркіндіктің, рух беріктігінің және адам мен табиғат арасындағы ажырамас байланыстың нышаны ретінде көрінеді. Сонымен қатар суретші күнделікті өмірдің қарапайым сәттеріне де назар аударып, ана мейірімін, отбасы жылуын, үй ошағын және ұрпақтар жалғастығын бейнелейді.

«Бабалар ізімен» көрмесі ұлттық дәстүр, табиғат және отбасылық жадының қазіргі кескіндеме тілімен қалай жаңаша пайымдалатынын көрсетеді. Экспозиция 1 қыркүйекке дейін жұмыс істейді.