Дәстүр мен маркетингті, ұлттық асхана мен эстетиканы, ал қазақша етті  — жылдам жеткізумен қалай үйлестіруге болады? Ас дайындай отырып, тұтас мәдениетті қайта жаңғыртып жүрген қазақстандық арудың тәжірибесінен қазақша ет – тек тағам түрі емес екенін байқаймыз. Бұл — ұрпақтар сабақтастығы, әулет мәртебесі және терең мәні бар бренд.

Ұлттық дәм — хайп емес

Әсемгүл Кабельдинова бірнеше жылдан бері ұлттық тағамдарды дайындауды үйретіп келеді. Ол жоба қатысушыларын қазы мен шұжықты өз қолымен жасауға баулыған.

— Мен дәстүрден қол үзбеймін, бірақ уақыт талабын да ескеремін. Міндетім — ұлттық асхананы бүгінгі аудиторияға түсінікті әрі жақын етіп жеткізу, — дейді кәсіпкер.

Оның арсеналында:

·        қазақ асханасын ілгерілету алаңдары ретінде Instagram мен TikTok-ты пайдалану;

·        ұлттық киімдер мен ет ұсыну дәстүрлері тоғысқан бірегей шеберлік сабақтары;

·        философиясы: қазы мен шұжық — жай ғана ас емес, отбасындағы махаббат, қамқорлық пен сыйластықтың нышаны.

Тұтынушыға дәмі, қаптамасы, эстетикасы және тарихы маңызды. Ол осының бәрін бір өнімге біріктіруге тырысады.

— Біз уақытты өзгерте алмаймыз, бірақ дәстүрді оның ырғағына бейімдей аламыз, — дейді ол. — Миссиямыз — ұлттық тағам мәнін жоғалтпай, заманауи тұтынушыға ыңғайлы қалыпқа енгізу.

Әсемгүлдің айтуынша, бұл жай ғана кәсіп емес. Бұл — ұлттық ас дәмін заманауи форматта жеткізетін жүйе.

Келесі қадам — халал өнімдерден жасалған жартылай фабрикаттар желісін іске қосу:

·        алдын ала пісірілген және порцияланған ет,

·        дайын қамыр,

·        сорпа негізіндегі хош иісті тұздық.

Осылайша үйде 15–20 минутта оңай дайындалатын өнім жасалады. Формат «Қазақша гриль-бар» деп аталды — тез, дәмді және нағыз ұлттық сарында.

Бұл шешім:

·        ет пісіруді білмейтіндерге,

·        жұмыстан шаршап келетіндерге,

·        еттің қандай мүшелерін салуды білмейтіндерге арналған.

— Біз қазақша етті тек қолжетімді ғана емес, эстетикалық тұрғыдан да тартымды еткіміз келеді. Махаббатпен — отбасы үшін, — дейді ол.

Асханадан — мәдени кодқа дейін

— Алғашында оңай болмады. Күйеуім екеуміз командасыз, дайын жүйесіз бастадық. Мал союдан бастап еден жууға дейін екеуміз ғана істедік. Тәулігіне 4–5 сағат қана ұйықтайтынбыз. Бірақ осының бәрі бізді мықты етті, — деп еске алады кәсіпкер.

Жоба отбасылық іске айналды. Күйеуі — бастамашы, әйелі — шабыт беруші әрі толыққанды серіктес.

Қазақша ет — бренд

— Егер қазақша етті жай ғана дәстүрлі тағам деп қабылдайтын болсақ, қателесеміз. Бұл — италиялықтар үшін паста немесе корей халқы үшін кимчхи сияқты бренд, — дейді Әсемгүл.

Оның тәсілі:

·        қазақша етті қызмет ретінде ұсыну;

·        заманауи визуалға қаптау;

·        шеберлік сабақтары мен медиа арқылы тарих пен құндылықтармен толықтыру;

·        эмоциялық байланыс орнату: өнімді жай ғана сату емес, сезіндіру.

— Біз жай ғана өнім сатпаймыз. Біз мәдениетті жеткіземіз, — дейді ол. — Сондықтан қазақша ет — бұл жай ғана дәм емес, мақтаныш, символ. Бұл сөреде тұрмайды — жүректе өмір сүреді.

Дайындықтың үш элементі

Дәмін сақтап, үдерісті жеңілдету үшін үш дайын элемент ұсынады:

1. Қамыр — қолмен жайылып, кесілген, салқындатылған күйде сақталады.

2. Ет — баяу отта алдын ала пісіріліп, дәстүрлі ережелер бойынша мүшеленген.

3. Тұздық — сорпа негізінде, пияз бен дәмдеуіштер қосылып, фирмалық рецептпен дайындалған.

— Бұл жай ғана жартылай фабрикат емес. Бұл — 20 минут ішінде дайын болатын ұлттық кешкі ас.