«Қазақ балеті: 90 жылдық тарих» картиналар көрмесі «Қазақ балетіне 89 жыл» арт-альбомының баспа жобасының жалғасы.

Жоба мақсаты көркем және дизайн өнері арқылы ұлттық музыкалық-хореографиялық мәдениетті сақтау және насихаттау.

Көрме мұражай, театр, жеке мұрағаттардан сирек кездесетін мұрағаттық фотосуреттер, бейнелер мен мәтіндер негізінде жасалған авторлық көркем суреттерден тұрады. Картиналарда Қазақ опера-балет театрының 90 жылдық кезеңдегі (альбом шежіресі 89 маусымның аяқталуымен үзіледі) ұлттық спектакльдердегі көріністер бейнеленген.

Олардың қатарында Абай атындағы Қазақ ұлттық опера және балет театры, Қазақстан Республикасының Мемлекеттік академиялық би театры, «Самұрық» қазіргі заманғы би театры, апалы-сіңлілі Ғаббасовтар би театры, Қ.Байсейітова атындағы Ұлттық опера және балет театры, «Астана Балет» театры, «Астана Опера» мемлекеттік опера және балет театрының қойылымдары бар. А. Селезнев атындағы Алматы хореографиялық училищесі мен Қазақ ұлттық өнер университетінің спектакльдері де ұсынылды.

Жобаны іске асыруға тек отандық мәдениет қайраткерлері — куратор Тоғжан Молдалим, Qazaq ballet creative Lab басшысы Дамир Оразымбетов, дизайнер Гузель Нұрымбетова, суретші Жаннат Баймұханова қатысты.

16 мамырда өтетін көрменің салтанатты ашылуына Абай атындағы опера және балет театрының және Болат Аюханов театрының әртістері, сондай-ақ Құрманғазы атындағы Қазақ ұлттық консерваториясының музыканттары қатысады.

Экспозиция 2024 жылдың 7 маусымына дейін жалғасады.