Қазақстан Республикасы Президентінің Архиві Мемлекет басшысының Жарлығымен Орталық мемлекеттік Жаңа тарих архивінің негізінде 1994 жылы құрылды.

1994 жылғы 12 сәуірде Қазақстан Республикасының Президенті Н. Ә. Назарбаев Архив туралы Ережені бекітті, соған сәйкес Архив тікелей қаржыландырылатын, ҚР Президентінің, оның Аппаратының және Мемлекет басшысының жанында қызмет ететін мемлекеттік органдардың қызметінде пайда болған құжаттарды жинау және сақтаумен айналысатын орталық мемлекеттік архивтің құқықтары мен міндеттері белгіленген мәртебесі бар дербес заңды тұлға атауына ие болды.

Алғашқы кезеңде мұнда Қазақстан КП Орталық, облыстық, қалалық комитеттерінің, Алматы қ. және Алматы облысының бастауыш партия ұйымдарының қорларынан тұратын 600 мыңға жуық сақтау бірліктері болды.

Архив Қазақстан Республикасы Президентіне бағынысты мемлекеттік органдардың және сонымен қатар қоғамдық бірлестіктердің, Қазақстан халқы ассамблеясының құрамына енетін республикалық маңыздағы ұлттық мәдени орталықтардың құжаттарымен толығады.

Архив Қазақстан Республикасы Президентінің, оның Әкімшілігінің және Мемлекет басшысына бағынысты және есепті басқа да мемлекеттік органдардың қызметін ақпараттық-архивтік қамтамасыз ету саласындағы негізгі міндеттерді атқаратын заманауи, технологиялық жарақтандырылған кешен.

Архив 1974 жылы типтік жобамен салынған ғимаратта орналасқан, 8 архивтік сақтау қоймасы және қызметтік бөлмелері бар. Архивтің сақтау қоймалары ұзындығы 29 мың метрге жуық стационарлық және мобильді металл сөрелермен жарақтандырылған, жасанды микроклиматтың және өрт-күзет дабылдарының автоматтандырылған жүйесіне қосылған.
Архивте егеменді мемлекеттің қалыптасуының дәуірлік оқиғаларын, еліміздегі ішкі және сыртқы саясаттың, халықаралық қатынастың, экономиканың, әлеуметтік-мәдени дамуының маңызды үрдістерінің санқырлы мәселелерін көрсететін бірегей ақпарат шоғырланған. 

Мұнда Қазақстан Республикасының Конституциясы (1995 ж.), Қазақстан Республикасының Тұңғыш Президенті Н. Ә. Назарбаевтың актілерінің түпнұсқалары, оның халықаралық конгресстерде, форумдар мен кездесулерде сөйлеген сөздерінің мәтіндері сақталған. 

Мемлекеттік орган құжаттары «Нұр Отан» партиясының, Социалистік партияның, Қазақстан Халық бірлігі партиясының, «Әділет» қазақстандық тарихи-ағарту ерікті қоғамының, Дүниежүзі қазақтары қауымдастығының құжаттарымен толығады.

Қазақстан Коммунистік партиясының, Қазақстан ЛКЖО Орталық комитеттерінің және олардың алдындағы саяси құрылымдардың қорында республиканың социализм дәуіріндегі қоғамдық-саяси және әлеуметтік-экономикалық өмірі туралы ақпарат жиналған. 

Қазақ КСР-інің құрылуы, күштеп отырықшыландыру мен саяси қуғын-сүргіндердің, өлкенің индустрияландырылуының тарихы, қуғын-сүргінге ұшыраған халықтардың депортациялануы, Ұлы Отан соғысы жылдарындағы Қазақстан, тың және тыңайған жерлерді игеру туралы құжаттар қызығушылық тудырады. 

Ақпарат archive.president.kz сайтында қол жетімді.